如風往事之——上海故事閒話叫蟈蟈

本人是土身土長呃上海人，勒拉本人所在呃城市上海、勒拉上嗰世紀90年代初中期之前，每家每戶呃經濟收入基本哴向僎是差大覅多呃，彼此之間呃差距也覅是交關大呃，每嗰號頭淨到手呃收入，也並覅是邪氣多噢，儘管是迭恁樣子，覅管是具有小資情調呃人家跟個人，還是普通呃人家跟個人，但凡是一些邪氣熱愛生活，希望家庭或者自家呃日腳恁夠越過越好、日腳每一天儕恁夠去過得蒸蒸日上呃，一樣僎是歡喜“情趣生活”呃，家庭跟嗰人多多少少儕會得去講究一眼“情趣生活”，每年僎會得精打細算呃截留一小部分銅鈿，用於“情趣生活”，從而恁讓生活變得豐富多彩一眼、富有一眼小情趣。

勒拉掰搿辰光呃上海人，每年只要是跨入到了夏秋季節裡向，主要呃情趣生活之一就是——邪氣歡喜傾聽各種蟲子呃鳴叫聲音。比方講：就有“夜烏子”，【備註：上海人對於學名叫“蟬”呃小蟲子有得兩種講法，第一是叫做“知了”，第尼是叫做“夜烏子”，但畀過叫“夜烏子”呃人唻邪氣多噢。】、“螳螂”、“金蛉子”、“油葫蘆”、“蹔蟣”【備註：上海人歡喜畀“蟋蟀”一律去叫做“蹔蟣”。】、“紡織娘”【備註：“叫蟈蟈”勒拉某些地區畀叫做“油子”，上海人則叫做“紡織娘”。】等等……自會得跑到花鳥市場購買迭些蟲子。

勒拉本人呃孩童跟少年時期，是跟外公倪根生外婆張榴妹以及大舅舅倪榴發住勒拉一道呃，每年只要是邁入到了夏秋季節，外婆伊眼扳數會得去購買一兩隻叫蟈蟈帶回家到屋裡廂。本人至今還恁夠清楚呃去記得，勒拉掰搿辰光，叫賣叫蟈蟈呃人，勒拉通常情況下頭，儕都是以一些農民老爺叔為主噢，勒拉偶爾辰光，也有得一些農民老阿奶出唻叫賣叫蟈蟈，勒拉伊拉呃肩膀上頭還挑著扁擔，勒拉扁擔呃上頭還去掛滿了各式各樣呃叫蟈蟈，走街串戶呃去叫賣叫蟈蟈……

叫蟈蟈僎都是放置勒拉細竹片編制呃、帶有洞眼呃、六角形呃籠子裡向呃，勒拉籠子呃上頭還繫著一根繩子唻，所繫呃繩子，勒拉一般情況下頭，儕都是以納鞋底呃鞋底線為主噢，之所以要迭恁樣子去做，最最主要呃原因就是因為——納鞋底呃鞋底線覅僅僅是交關牢固呃，而且還覅大容易斷忒。畀過，也有拿粉紅色呃塑膠線系叫蟈蟈呃籠子。考究一眼呃，畀放置勒拉竹製呃、像鳥籠一樣呃籠子裡。

外婆勒拉購買叫蟈蟈呃辰光，總歸要去精挑細選一番，會得去挑選一些嗰頭邪氣大呃、鳴叫聲音交關響亮呃，假使講叫蟈蟈呃中氣覅足，鳴叫聲邪氣輕盈，或者講一些覅大歡喜去鳴叫呃，便堅決給予退貨覅要了。每間隔一段辰光，伊還要到菜市場去購買一些毛豆（子）回唻，而且還要去挑選一些顆粒邪氣飽滿呃、有三段長呃毛豆（子）畀叫蟈蟈吃。勒拉畀叫蟈蟈吃毛豆（子）之前，外婆還要讓毛豆（子）沐浴一番，讓毛豆（子）全部去浸泡勒拉水裡向，等到毛豆（子）吸足了水分以後再去餵食。伊對本人講道：“外婆之所以要迭恁去做，僎是因為叫蟈蟈也像人一樣，伊也會有飢渴跟叫覅動呃辰光，儂要是恁適時呃讓伊美美呃去飽餐一頓，等到了叫蟈蟈吃飽喝足了以後，伊呃精神頭也畀養好了，到辰光伊又恁歡快呃鳴叫起唻了！”……

之所以每年到了迭嗰時節，外婆總歸要去購買一兩隻叫蟈蟈，伊是迭恁唻告訴本人呃，儕是因為唯有迭恁樣子去做，伊才恁夠真真切切呃去感受到夏秋季節呃到唻，到了夏秋季節呃夜快頭，只要是傾聽到了叫蟈蟈呃鳴叫聲音，才可以安心呃去睏覺噢，要覅然呃閒話，假使是自家忘記忒去購買叫蟈蟈，或者講傾聽覅到叫蟈蟈呃鳴叫聲音，既嘸辦法去睏覺、覺也困覅著，又好像是缺少了一眼麼事一樣！

需要去講清爽呃一樁事體就是，今早仔呃上海灘哴向，基本哴向已經是嘸有啥呃縣城跟郊區了，原先呃郊縣跟郊區，幾乎僎畀升級演變成為了市區，勒拉每嗰區裡向，基本哴向儕有得大大小小呃花鳥市場，想要去購買花鳥魚蟲呃辰光，就可以去花鳥市場逛一逛兜一兜。比方講：有得黃浦區陰路花鳥市場、閘北區靈石路花鳥市場、楊浦區五角場花鳥市場……然而，勒拉筆者呃孩童跟少年時期，覅僅僅是居住勒拉浦東郊區呃，勒拉掰搿辰光浦東是屬於川沙縣管轄呃，而且勒拉掰搿辰光還嘸得啥呃花鳥市場哩，假使講要去花鳥市場呃閒話，眼扳數要跑到市區浦西去噢，勒拉中間還間隔著一條黃浦江哩，勒拉掰搿辰光，還嘸得啥呃越江隧道跟跨江大橋，還需要擺渡才恁夠過江，還要是碰到了一些大霧瀰漫呃天氣裡向，自輪渡擺渡船還要去停航唻，所以講是邪氣覅便當呃一樁事體！因此講，要想去購買一些只有勒拉夏秋季節才出現呃、各式各樣恁夠去鳴叫呃蟲子、去傾聽各種蟲子呃鳴叫聲音，也只恁夠向走街串戶呃農民老爺叔跟老阿奶去購買！

正所謂有一句老古閒話講得好，講道：“近朱者赤近墨者黑！”勒拉啥呃家庭跟環境呃薰陶下頭，所培育出唻呃人，伊眼扳數是跟所處呃環境跟家庭是差大覅多呃，由於長期勒拉祖輩潛移默化呃影響下頭，本人也同樣是邪氣歡喜叫蟈蟈鳴叫聲音呃，勒拉本人呃小辰光，唯有聆聽到了叫蟈蟈呃鳴叫聲音，以及各種蟲子呃鳴叫之聲，才可以安然地去睏覺哩。實在是困覅著呃辰光，只要是恁夠傾聽到各類蟲子呃鳴叫聲音，用覅著多少辰光，就恁夠安然地去入睡睏覺了，就恁呼呼大睡呃進入到蘇州去了，迭些蟲子呃鳴叫聲，畀本人呃一種感覺就好像是一嗰嗰演奏家，又彷彿勒拉演奏一首悅耳動聽呃催眠曲。

儘管外婆伊本人幾乎是一嗰目不識丁呃家庭婦女，最多隻認得自家呃名字噢，而且還要畀迭三嗰字放勒拉一道才恁去認得噢，如果去分開唻了，一嗰字也是覅認得呃，亦覅懂得啥叫做“情趣生活”噢，以及迭四嗰字所帶畀人呃深刻含義哩，伊每嗰號頭生活唻源，主要依靠呃是外公微薄呃退休工資，但是伊本人對於美好呃生活，過上太平日腳跟好日腳，還是交關歡喜呃，只要是勒拉力所及呃範圍內，還只要手頭上有一眼寬裕，眼扳數會得為平順跟平淡呃俗常生活，去增添一眼眼“色彩”、“活力”、“生機”、“美麗”、“美好”……從而恁讓自家呃生活跟家庭生活，僎恁變得豐富多彩一眼，去過好每一天、去過好只屬於自家呃、自認為是邪氣幸福美好呃生活噢……